ប្រវត្តិ សង្ខេប លោក កាន់ ផារិទ្ធ -History of Mr. Kan Pharidh by សង្ខេប Sangkeb

 

លោក កាន់ ផារិទ្ធ 

លោក កាន់ ផារិទ្ធ ត្រូវបានព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រ ​នៃព្រះរាជាណាចក្រកម្ពុជា ត្រាស់បង្គាប់ តែងតាំង ជារដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ។នេះបើយោង តាមព្រះរាជក្រឹត្យ ចុះថ្ងៃទី២២ ខែសីហាឆ្នាំ២០២៣។

 

លោក កាន់ ផារិទ្ធ កើតនៅថ្ងៃទី ១៩ ខែ វិច្ឆិកា ឆ្នាំ១៩៥៦ នៅរាជធានីភ្នំពេញ។ លោកបានរៀបការ និងមានកូនចំនួន ៤នាក់។

 

ប្រវត្តិការសិក្សា

លោក កាន់ ផារិទ្ធ បានបញ្ចប់ការសិក្សាថ្នាក់ អនុបណ្ឌិតផ្នែកកិច្ចការបរទេស និងពាណិជ្ជកម្មនៃសាកលវិទ្យាល័យម៉ូណាសប្រទេសអូស្ត្រាលី នៅឆ្នាំ១៩៩៩។

បញ្ចប់ថ្នាក់វិញ្ញាបនប័ត្របទពិសោធន៍ សមាហរណកម្មសហភាពអឺរ៉ុប និងបណ្តាប្រទេសក្នុងមហាអនុតំបន់ទន្លេមេគង្គ នៃសាលាជាតិរដ្ឋបាល ទីក្រុងប៉ារីស ប្រទេសបារាំង នៅឆ្នាំ១៩៩៩។ និង សញ្ញាបត្រផ្នែកកិច្ចសហប្រតិបត្តិការអន្តរជាតិកម្ពុជា នៃមជ្ឈមណ្ឌលកិច្ចសហប្រតិបត្តិការអន្តរជាតិ  ឃ្យូ​ស៊ូ ប្រទេសជប៉ុន នៅឆ្នាំ១៩៩៤។ លោក កាន់ ផារិទ្ធ អាចប្រើប្រាស់ភាសាបរទេសចំនួន៣ភាសា គឺភាសា អង់គ្លេស ជប៉ុន និង បារាំង។

 

ប្រវត្តិការងារ

លោក កាន់ ផារិទ្ធ ជារដ្ឋលេខាធិការក្រសួងការបរទេស  ដែលត្រូវទទួលបន្ទុកលើការងារអង្គការសហប្រជាជាតិ អង្គការអន្តរជាតិ និង ការងារប្រតិបត្តិការថែរក្សាសន្តិភាព។ លោក កាន់ ផារិទ្ធ បានប្រឡូកក្នុងវិស័យការបរទេសជាច្រើនឆ្នាំមកហើយ ពោលគឺ លោកបានចូលបម្រើការនៅក្រសួងការបរទេស ជាមន្ត្រីនៃនាយកដ្ឋានទំនាក់ទំនងជាមួយអង្គការអន្តរជាតិនៃក្រសួងការបរទេសតាំងពីឆ្នាំ១៩៨២ឯណោះ។

 

រយៈពេលជាង៤០ឆ្នាំមកនេះ លោកទទួលបានការប្រគល់តួនាទី-ភារកិច្ចជាច្រើន រួមមាន៖ លេខាទី២ នៃស្ថានទូតព្រះរាជាណាចក្រកម្ពុជានៅប្រទេសឥណ្ឌា។លេខាផ្ទាល់ រដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ។អនុប្រធាននាយកដ្ឋាន នៃអគ្គនាយកដ្ឋានអាស៊ាន-កម្ពុជា ទទួលបន្ទុកកិច្ចការដៃគូសន្ទនាអាស៊ាន នៃក្រសួងការបរទេស និងសហប្រតិបត្តិការអន្តរជាតិ។អគ្គនាយករង នៃអគ្គនាយកដ្ឋានអាស៊ាន - កម្ពុជា ទទួលបន្ទុកកិច្ចការសេដ្ឋកិច្ច និងកិច្ចសហប្រតិបត្តិការ នៃក្រសួងការបរទេសនិងសហប្រតិបត្តិការអន្តរជាតិ។អគ្គទីប្រឹក្សា/ អនុប្រធានបេសកកម្ម នៃស្ថានទូតព្រះរាជាណាចក្រកម្ពុជាប្រចាំ សាធារណរដ្ឋឥណ្ឌូនេស៊ី។អគ្គនាយករង នៃអគ្គនាយកដ្ឋានអាស៊ាន- កម្ពុជា ទទួលបន្ទុកកិច្ចការនយោបាយនិងសន្តិសុខ នៃក្រសួងការបរទេសនិងសហប្រតិបត្តិការអន្តរជាតិ។

 

បន្ថែមពីលើនេះ លោក កាន់ ផារិទ្ធ ក៏ធ្លាប់កាន់តួនាទី អគ្គនាយក នៃអគ្គនាយកដ្ឋាន អាស៊ាន-កម្ពុជា      ក្រសួងការបរទេស និងសហប្រតិបត្តិការអន្តរជាតិ។ឯកអគ្គរាជទូត តំណាងអចិន្ដ្រៃយ៍កម្ពុជា ប្រចាំអាស៊ាន។ឯកអគ្គរាជទូតវិសាមញ្ញ និងពេញសមត្ថភាពរបស់ព្រះរាជាណាចក្រ​កម្ពុជា ប្រចាំសា​ធារណ​រដ្ឋឥណ្ឌូនេស៊ី។អ្នកជំនាញជាន់ខ្ពស់ នៃវេទិកាតំបន់អាស៊ានរបស់ប្រទេសកម្ពុជា ។អនុរដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ។

រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ 

ឧត្តមមន្រ្តីអាស៊ាន-កម្ពុជា

តំណាងអចិន្ត្រៃ​យ៍កម្ពុជា​ប្រចាំ​គណៈ​កម្មាធិការមជ្ឈមណ្ឌលសកម្មភាពមីនក្នុងតំបន់អាស៊ាន ។ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជា ប្រចាំចក្រភពអង់គ្លេសដាណឺម៉ាក ហ្វាំងឡង់ ន័រវេស ស៊ុយអែត អៀរឡង់។

 

គ្រឿងឥស្សរិយយស

មេដាយជាតូបការ​

គ្រឿងឥស្សរិយយស ព្រះរាជាណាចក្រ​កម្ពុជា ថ្នាក់ មហាសេរីវឌ្ឍន៍

គ្រឿងឥស្សរិយយស ព្រះរាជាណាចក្រ​កម្ពុជា ថ្នាក់មហាសេនា

គ្រឿងឥស្សរិយយស​ មុនីសារាភ័ណ្ឌ ថ្នាក់មហាសេនា

មេដាយមាសការងារ

Via:mfaic+sangkeb