ប្រវត្តិ សង្ខេប លោកស្រី ផន សុផារី-History of Mrs. Phorn Sophary by សង្ខេប Sangkeb

អ្នកនាង ផន សុផារី គឺជាអ្នកលេងល្ខោនបាសាក់ល្បីឈ្មោះ និងជាអតីតតារាកំប្លែង នាងបានប្រឡូកក្នុងវិស័យសិល្បៈអស់រយៈពេលជាច្រើនឆ្នាំមកហើយ ប៉ុន្តែពុំទាន់មានគេចាប់អារម្មណ៍ច្រើនទេ ទើបតែពេលនាងលេចមុខសម្ដែងនៅក្រុមកំប្លែងនាយគ្រឿនក៏ត្រូវទស្សនិកជនជាច្រើនចាប់អារម្មណ៍ពីទេពកោសល្យ និងសម្រស់របស់នាង ហើយអ្វីដែលធ្វើអោយមហាជនស្គាល់ កាន់តែច្បាស់នោះ គឺពេលអ្នកនាងទទួបានកូនស្រី ដែលមានភាពឆ្លាតវៃក្រមិចក្រមើមគួរអោយខ្នាញ់ ចាប់ពីពេលនោះហើយ ភាពល្បីល្បាញរបស់នាងកាន់តែល្បីខ្លាំងបន្ថែមទៀត។

លោកស្រី ផន សុផារី កើត នៅថ្ងៃទី ២២ ខែសីហា ឆ្នាំ ១៩៩៥ នេះបើយោងតាមរយះការផុសនៅលើបណ្ដាញហ្វេសបុក មានស្រុកកំណើត នៅឃុំត្រពាំងសាប ស្រុកបាទី ខេត្តតាកែវ។លោកស្រី សុផារីមានបងប្អូនប្រុសស្រីចំនួន ៤នាក់ ក្នុងនោះស្រី៣នាក់ ចំណែករូបនាងគឺជាកូនទី២ ។ លោកស្រីគឺជាកូន របស់លោក ផន សុភី ចំណែកម្ដាយឈ្មោះ សួង សុគន្ធី ។

លោកស្រី ផន សុផារី បានរៀបអាពាពិពារជាមួយលោកសុង សុវណ្ណារ៉ា នៅឆ្នាំ ០១ ខែឧសភា ២០១៧ នឹងមានកូនស្រីជាចំណងដៃចំនួនពីនាក់ កូនស្រីច្បង ឈ្មោះ វណ្ណារ៉ា រីប៊ែលឡា កើតនៅថ្ងៃទី ១៦/កុម្ភះ/២០១៨ និងកូនស្រីប្អូន ឈ្មោះ វណ្ណារ៉ា រីអ៊ែលលី

នៅក្នុងបទសម្ភាស ផន សុផារី បានរៀបរាប់ឱ្យដឹងថា នាងមានប្រភពចេញពីវង្សត្រកូលអ្នកសិល្បៈបុរាណល្ខោនបាសាក់ ។ នាងជាសមាជិកក្រុមល្ខោនដ៏ល្បី វង់ភី សុគន្ធី ដែលដាក់តាមឈ្មោះឪពុកម្ដាយរបស់នាង។

លោកស្រីបានរៀបរាប់បន្ថែមថា ពេលទំនេរពីការសិក្សា និងការសម្ដែងផ្សេងៗ នាងត្រូវគេទាក់ទងឱ្យទៅច្រៀងបទប្រពៃណីនៅក្នុងពិធីមង្គលការផ្សេងៗ ។

អ្នកលេងល្ខោនបាសាក់ល្បីឈ្មោះរាងតូចច្រឡឹករូបនេះឱ្យដឹងថា ដោយសារតែនាងជាកូនអ្នកល្ខោនបាសាក់ ដូច្នេះហើយនាងចេះច្រៀង និងសម្ដែងតាំងពីអាយុ៣ឆ្នាំមកម្លេះ ។

ពេលនេះរូបនាងបានទទួលចំណេះដឹងជាច្រើពីឪពុកម្ដាយ និងលោកគ្រូអ្នកគ្រូរបស់នាងដែលមានដូចជា ច្រៀងបទប្រពៃណី យីកេ បាសាក់ របាំព្រះរាជទ្រព្យ និងចម្រៀងសម័យជាដើម ។

មិនតែប៉ុណ្ណោះលោកស្រីក៏បានហាត់រៀនផ្នែកចម្រៀងអាយ៉ៃ ពីលោកដួង សុគា ដែលមានស្រុកកំណើតនៅខេត្តតាកែវដូចលោកស្រីផងដែរ ។

អ្នកនាង ផន សុផារី ពីដំបូងមិនបានដឹងខ្លួនថាមានឱកាសក្លាយខ្លួនជាតារាកំប្លែងទេព្រោះតែនាងគឺជាអ្នកល្ខោនបាសាក់ ។ មានថ្ងៃមួយរូបនាងបានទៅសម្ដែងជាមួយក្រុមល្ខោនបាសាក់របស់ឪពុកម្ដាយនាងនៅស្ថានីយទូរទស្សន៍CTN ក្នុងកម្មវិធី សុគា លក្ខិណា ប៊ីអាយជី ។ ក្រោយមកលោកសុវណ្ណ រិទ្ធី ហៅលោកតា វិចទ័រ បានទាក់ទងឱ្យរូបនាងចូលសម្ដែង ហើយនាងក៏ក្លាយជាតារាកំប្លែងរហូតមកដល់ពេលនេះ ។

ស្រីតូចច្រឡឹងរូបនេះឱ្យដឹងទៀតថា កន្លងមកមិត្តភក្ដិរបស់នាងជាច្រើនសួររូបនាងថា នាងនៅក្មេងសោះហេតុអ្វីបានជាចាប់អាជីពជាអ្នកកំប្លែង និងជាអ្នកចម្រៀងប្រពៃណីទៅវិញ ។ ចំណុចនេះនាងប្រាប់ថា មិនថាតែចម្រៀងសម័យ ឬក៏បុរាណទេ គឺនាងស្រឡាញ់ទាំងអស់ សំខាន់ឱ្យតែជាសិល្បៈខ្មែរ គ្រាន់តែថាពេលនេះនាងមិនទាន់មានឱកាសចាប់យកអាជីពជាអ្នកសិល្បៈសម័យឱ្យបានច្បាស់លាស់ដូចសិល្បៈបុរាណនៅឡើយ ។

សំឡឹងទៅអនាគត លោកស្រី ផន សុផារី ប្រាថ្នាក្លាយជាប្រភពផ្ដល់ការកម្សាន្តអារម្មណ៍តាមរយៈទេពកោសល្យសិល្បៈដ៏សម្បូរបែបរបស់នាងគួរជាទីពេញចិត្តរបស់ទស្សនិកជន ៕